玩新郎玩死新郎（上）
「跟住落嚟，新郎要跪喺度，表達對新娘嘅臣服，新娘會打阿康十四巴。
每打一巴，新郎都要講一句認低威嘅說話，比如：『老婆大人我錯啦』、『我係老婆大人嘅奴隸』。
如果十四巴內，新郎講嘅嘢重覆咗，新娘就會將佢個頭撞落牆上，小懲大戒。」
我將紙條上嘅「玩新郎」環節讀出嚟，講完之後，我自己都覺得難受。
作為新郎阿康嘅好兄弟，作為呢次婚禮嘅攝影師，我忍唔住出聲：「會唔會過份咗少少？」
「冇嘢嘅。」新娘擺擺手：「我知你哋男人要面，我已經叫晒啲姐妹出去，呢間房得我哋三個，冇人睇到。」
我恍然大悟：「咁我熄咗部cam先。」
「唔得，要拍低晒佢，朝拍晚播，夜晚仲要播片㗎。」新娘高聲制止。
我下意識答：「你又話冇人睇到……」
但新娘冇理到我，佢惡狠狠咁望向阿康：「你又話愛我，你話咩都聽晒我話，咁你依加做唔做丫？」
我同阿康交換一個眼色，我發出嘅訊號係「呢個女人你都要娶？」，阿康嘅回答係「事到如今……」。
唉，做就做啦，一個願打一個願捱，關我鬼事咩。
我開始錄影，新娘好似女王一樣，氣勢十足咁走向阿康，一巴打埋去。
「老婆大人我愛你！」阿康連忙講。
又一巴。
「我會聽晒老婆大人話。」阿康講。
接連打咗幾巴，阿康情急之下，連「我係食屎狗」都講埋出嚟。
新娘皺皺眉頭，好似有啲唔滿意，但都繼續打下一巴。
阿康唔知係江郎才盡，定係俾人打傻咗，居然講唔出任何說話。
新娘毫不留情咁捉住佢嘅頭髮，將佢個頭狠狠撞落牆度：「咁簡單你都諗唔到，你係咪低能㗎？」
一下、又一下……「咚」、「咚」嘅撞牆聲，好似一下一下咁撞落我個心度。
阿康一開始仲求饒：「老婆大人對唔住！」「我諗到啦，你停一停！」
但突然間，佢嘅求饒聲停咗。
新娘呆一呆，鬆開手，阿康嘅身體好似一個爛布袋一樣，從牆上滑落嚟。
「老公！你做咩事啊？」新娘連把聲都震埋。
佢伸手去摸阿康嘅呼吸，然後好似觸電一樣縮手，成個彈開，縮埋牆角，滿眼震驚。
我都俾新娘嘅反應嚇一跳，小心翼翼咁行埋去，探一探阿康嘅呼吸。
真係冇咗呼吸！
我忍住內心嘅驚駭，摸一摸佢頸邊嘅脈搏，仲跳動緊。
我鬆咗半口氣，阿康仲未死，仲有得救。
「冇可能㗎，佢一個大男人，點會玩吓就死。」新娘靠喺牆邊，一路講一路流眼淚，喊到個妝都花晒。
「佢未死㗎，我部手機呢？」
新娘搵咗幾秒，轉頭望向我：「借部手機嚟，我Call白車，救番我老公！」
咁當然要Call白車，我對手仲拎住部cam，我就想放低部Cam，再拎手機畀佢。
呢個時候，新娘成個撲埋嚟，想從我褲袋度搶手機。
手忙腳亂間，我部cam跌咗落地下。
我仲未反應過來，新娘就好似上咗電咁，一腳踩落部cam度。
然後，新娘好似識四川變臉術咁，表情瞬間由悲痛變成冷漠。
原來乜嘢搵唔到手機、借手機，只係佢乘機整爛我部Cam嘅藉口。
新娘望住我：「你知道，佢嘅死，你都有責任。」
吓？
新娘繼續講：「啱啱嗰張紙係你讀出嚟，係你叫我咁樣玩阿康。」
「但張紙係你啲姐妹畀我㗎……」我反駁。
新娘冇再糾纏呢個問題，佢指一指阿康：「你知唔知佢成日笑你？」
我唔明。
「你上次想追個女仔，好似叫……阿萍，仲叫佢幫手諗方法。係啊，阿康好似好努力幫你。」
新娘撇撇嘴：「但佢背後同我講，你又肥又醜，邊有可能溝到女，用咩方法都冇用啦。」
我冇信到新娘嘅挑撥離間，我拎出手機，正要打「999」。
下集：https://bit.ly/3qVzLeT
將專頁設定為「搶先看」/ "See first"，最新故仔馬上睇！
我想做閃電俠：https://goo.gl/585hFA
懷才不遇之後：http://bit.do/fkgAZ
#短故 #短篇 #小說 #陳美濤 #廣東話 #粵語 #tomatochan #玩新郎玩死新郎
Search